உகிர் கூர்த்த மதயானை
கனவொன்றில் துரத்துகிறது
இன்னொன்றில்
இருட்டுச் சந்தின் குறுக்கத்தில்
சாக்கடைத் திட்டுகளை
விரைந்து கடக்கையில்
எதையோ தவறவிட்டுத் தேடுகிறேன்
வேறொரு விடிகாலையில்
முடித்துவிட்ட வகுப்பொன்றில்
பள்ளியில் மீண்டும் சேர்ந்து
தேர்வுநாளில் நேரம்தப்பித் தவிக்கிறேன்
படிக்கும் நூலை
பார்க்கும் வேலையை
படுக்கும் இடத்தை
இவற்றில்
எதை மாற்ற
எதற்காக மாற்ற?
ஈரப் பச்சை வயல்களுக்கிடையே
இருக்கிறது ஒரு உவர்நிலம்
வெளுத்த மண்பொட்டல்
வாய்க்கால் இருக்கும் பக்கம்
நீர் கசிந்து உப்புப் பரிந்திருக்கும்
கண்ணாடிச் சில்லுகள்
காக்காமுட்கள்
மத்தியில் ஒரு நைந்த செந்துணி
பாதி புதைந்து வெளித்தெரியும்
வீடுகளுக்கிடையே இருக்கிறது
வில்லங்கத்திலிருக்கும் காலிமனை
செழித்த சீமைக்கருவேலப் புதர் நிழல்
பால்பச்சை எருக்கஞ்செடிகள்
மழுமட்டைச்செடிகளில்
பூத்துச்சிரிக்கும் ரேடியோப்பூக்கள்
எங்கிருந்தோ இடிபட்டுக் கொட்டப்பட்ட
கான்கிரீட் கட்டி ஒன்றிலிருந்து
காளானொன்று முண்டி முளைக்கும்
அவர் இருக்குமிடந்தான்
நமது கோயில்
அவர் முன்பாகக்
கடந்து செல்லும்போது
சிறிது நின்று
காலணி தளர்த்தி
கரங்குவித்துயர்த்தி
வணங்கலாம்
பக்கவாட்டில் முழங்கை படர்த்தி
நெஞ்சுதொட்டு இறைஞ்சலாம்
அல்லது
ஏதோ குளிர்பானப் புட்டி வைத்திருப்பதுபோல
உதடுவரை ஒரு கையுயர்த்தி
முத்தமிடலாம்
ஒன்றுமில்லையென்றால்
அலைபேசியைக் காதில்வைத்து
கவனியாததுபோல் கடந்துவிடலாம்
அடக்கமுடியாமல்
காற்றுபிரிய விடுவதெல்லாம்
சற்றுக்கும் சற்று
மிகையாகவே மிகை
இரவு
பகல்
மீண்டும்
இரவு
பகல்
மீண்டால்
இரவு
பகல்
18/05/11
ஊரில் இருக்கையில்
மார்கழியில் விடியுமுன்னேயே
குளிக்காவிட்டால் பீடை
நகர் நகர்ந்தபின்
விடுமுறைநாள் முழுக்க
குளிக்காதிருந்தால் கொஞ்சம்
ஒரு மாதிரியிருக்கும்
இரவுகளும் பகல்களுமாய்
இருநாட்கள் நீளும்
இரயில் பயணங்களுக்குப்
பழகியபின்னும்
புறந்தூய்மை நீரால்தான் அமைகிறது –
ஆனால் வசதிப்படும்போது
25/12/13
வா: “எனக்குச் சுத்திவளைச்சுப் பேசுறது பிடிக்காது. கொஞ்சம் சொல்ல வந்ததை நேரடியா சொல்றிங்களா?”
அ: “கட்டாயமா! நீங்க சொல்றது நூத்துக்கு நூறு சரி!. அப்படி நேரடியாப் பேசுறதுக்கே உரிய சில சாதகங்கள் உண்டுன்னாலும் அது எல்லா நேரத்துலயும் நல்ல விளைவுகளை ஏற்படுத்திறதில்லைங்கிறதையும் உண்மை சுடும் என்பதையும் அனுபவப்பூர்வமா எல்லாருமே உணர்றோம்தான் இல்லயா?”
வா: “இனிக்கிற விஷத்தைவிட கசக்கிற மருந்து நல்லது”
அ: “நான் நெனைச்சத சொல்லிட்டீங்க! மருந்துலயும் இனிப்பு தடவிக் கொடுக்கிற வழக்கம் அந்த துறைசார்ந்து நெடுங்காலமா நிலவிவருவதா ஆய்வுமுடிவுகள் தெரிவிக்குது”
வா: சும்மானாச்சுக்கும் மருந்துன்னு சொல்லி சத்துமாத்திரை கொடுக்கிறதுந்தான் நடக்குது.
அ: “ஹஹ்ஹ்ஹ்ஹா”
வா: “சிரித்து வாழ வேண்டும்”ங்கிறதை நல்லா கடைபிடிக்கிறீங்க
அ: “சரியாச் சொன்னீங்க. இதைத்தான் “இளித்துப் பிழைக்க வேண்டும்”னு எங்களுக்கு சொல்லித் தருவாங்க
[அ – மேலாண்மை அறிவுரைஞன், வா- வாடிக்கையாளன்]
25/10/2013
மாந்திரீகனால்
குடத்துக்குள் அடைக்கப்பட்ட
ஆவியைப்போல
தாள்களில் விரவிய
எண்களாய், எழுத்தாய்
கோப்புக்குள் அடைந்துகிடக்கிறது
அப்போதுதான் முடிந்த
கல்லூரிப் படிப்பு
கோப்பு முகப்பின்
சிறு சாளரத்தில்
எழுதி இடப்பட்டிருக்கும்
முகவரி உணர்த்தும்
எப்போதும் தொலையலாம்
என்ற அச்சத்தை
கூடவே
எவரேனும் கண்டடைந்து
உரிய முகவரியில்
ஒப்படைத்திடலாம்
எனும் நம்பிக்கையையும்.
05/09/2008
கொன்றை, செவ்வந்தி
கோழிக்கொண்டை, அரளி என்று
வண்ணவண்ணப் பூச்செடிகள்
வரிசைவரிசையாய்
அலுவலக வளாகத்தில்
அவற்றுக்கு நல்ல கவனிப்பு.
உரிய நீர், உரம், ஊட்டம்.
மார்ச் மத்தியில்
ஒதுக்கீட்டுநிதியைச் செலவழித்துமுடிக்க
குத்துச்செடிகளை ஒட்டநறுக்கி
குறுஞ்செடிகளைப் கொத்தாகப்பிடுங்கி
புதுச்செடிகள் நடுவார்கள்
25/12/13
ஓய்ந்து உட்கார நிழலற்ற இடந்தான்
உறைக்காத ஊமைவெயில்தானே அடிக்கிறது
உழைத்துவிட்டுப் போவோம், விடு!
17/01/14
ஆளெடுப்பு நடக்கிறது
அம்மி கொத்தும் பணி
ஆகச்சிறந்த சிற்பிகள்
மட்டும் விண்ணப்பிக்க.
05/09/08
கொப்பரமுழுங்கி 