நகுலனையோ பிறரையோ
போலிசெய்யாதே என்றான் விமர்சகன்
திமிராகக் கேட்டேன்
‘எந்த நகுலன்?’ என்றல்ல
‘யார் நகுலன்?’ என்று
(இதற்கிடையே
பக்கத்து வீட்டுச் சிறுவனை
‘டே, நகுல்!’ என்று விளித்தபோது
திரும்பவும் திருத்தினான்
‘ஜி இல்லை அங்கிள், கே!
ந(க்)குல்’)
செருக்குற மொழிவேன்:
நான் எழுதியது நான் எழுதியதுதான்
நான் எழுதியது எழுதியதுதான்
18/05/14
கரிப்புச் சுவை பொங்க
கவிதை எழுதும்படி
கழுதைக்கு அப்படி
என்னதான் நேர்ந்துவிட்டது?
இப்படி எதையாவது
எழுதிவிட முடிகிறதென்பதே
இனிப்பான விஷயந்தான் இல்லையா?
02/01/14
சிறிது உப்பு
அந்த சாம்பாரை
சுவை மிகுந்ததாக்கிவிடுவதைப் போல
சின்ன மூக்குத்தி
அந்தப் பெண்ணைப்
பேரழகியாக்கிவிடுவதைப்போல
இருட்குகையின் உள்ளே
பாறைப்பிளவு வழி
ஒற்றைக் கீற்றாய்
உள்நுழையும் கதிரொளி
விரவி வெளிச்சம் தருவதுபோல
எனது கவிதை
எந்த இதழையும்
செழுமை கொண்டதாக்குகிறது
22/11/13
என் பங்குக்கு
சிறிதாகவேனும் ஒரு
காதல் கவிதையை
எழுதி விடுகிறேன்
காதல் என்பது
கடவுள் மாதிரி
இதுவிஷயத்தில்
நானொரு நாத்திகன்
காதல் என்பது
கைவிலங்கு
கால விரயம்
காம ஒப்பனை
ச்சீச்சி…
இந்தப் பழம்
ரொம்பப் புளிக்கும்
16/07/2008
தொடர்ந்து
கவனித்து வாருங்கள்
என்றேனும் ஒருநாள்
நான் கவிதைகளை
எழுதிவிடக் கூடும்
16/07/2008
தலைப்புகள் இடுவதற்குச்
சல்லையாய் இருக்கிறது
தலைப்புகள் அற்றவை
முண்டமாய் நிற்கின்றன
தலைப்புகள் உள்ளவை
மூளியாய் நிற்கின்றன
மூளிக்கு ஒரே தலை
முண்டத்துக்கு ஆயிரந் தலைகள்
16/07/08
பதவிகளில் இருப்பவர்கள்
கவிதைகள் முடைகிறார்கள்
அப்படைப்புகள்
பலத்த பாராட்டுக்குள்ளாகின்றன
எல்லாத் திசைகளிலிருந்தும்
ஏவப்படுகின்றன
விருதுக் கணைகள்
ஆராய்ச்சி ஈக்கள்
வந்து
அப்பிக் கொள்கின்றன
படைப்பு நாற்றம்
பல மொழிகளுக்கும்
பரவுகிறது
இனிவரும்
பட்டமளிப்பு விழாக்களில்
கருப்புத் தொப்பிகளுக்குப்
பதிலாய்
முடைந்த கவிதைகளைத்
தலையில் கவிழ்த்துக்கொள்வதென்று
முடிவு செய்கிறார்கள்
பல்கலைக்கழகங்களில்.
09/07/2008
எருக்க விதை சுமந்த
பஞ்சுப் பாராசூட்
பறத்தல் அழகுதான்
முளைத்தாலோ சீண்டுதற்கு
ஆடுமில்லை; ஆளுமில்லை
என்றாலும், விதை அது;
பறக்கத்தான் வேண்டும்
முளைக்கத்தான் வேண்டும்
19/12/13
நினைவுக் குரங்கும்
மறதிப் புலியும்
உலவும் காடு
குறுகிப் போய்
குருட்டுப் போக்கில்
கலங்கிப் பாயும்
எண்ண நீரோடை
பொதுவாக வறண்டுகிடக்கும் வனத்தில்
இடையிடையில் எப்போதாவது
கவிதைச்சாரல்
07/01/14
இது வசதியாக இருக்கிறது
எதுவுமே இல்லையென்றாலும்
ஏதோ இருப்பதுபோலவே காட்டலாம்
சொல்ல வருவது பற்றிய தெளிவின்றியே
சொல்லி முடித்துவிடலாம்
யாப்பும் அணியும்
ஆய்வும் அடிக்குறிப்பும்
எதுவுமே தேவையில்லை
சிறியதே போதும்
வரி என்பது ஓரிரு சொற்கள்
படைப்பு என்பது ஓரிரு வரிகள்
சொல்லுதல் யார்க்கும் எளிய;
கவிதை சொல்லுதல் அதனினும் எளிய.
27/12/13
கொப்பரமுழுங்கி 