“கொள்ளையடிக்க வர்றவனே கொல்லாமக் கட்டிப்போட்டுட்டுதான் போறான். அவனை நீ என்கவுன்டர்ல போடணும்ங்கிற?”
“அவனும் வக்கீலு. நீயும் வக்கீலு. சட்ட அறிவை வைச்சு, வாதத்திறமையை வச்சு சந்தி. அதை விட்டுப்புட்டு அவன் கோர்ட்டுக்கு வரும்போது அழுகின முட்டையால அடிக்கிற?”
சொன்ன கணத்துப் புனிதர்களுக்கு நன்றி
நானொரு வினோத தாவரம்
உடல் நாணல்
மலர் அனிச்சம்
நானொரு வினோத வாகனம்
இலக்கு அழைக்கும்
நிறுத்தம் பிடித்துவைக்கும்
நானொரு வினோத எந்திரம்
மென்பொருள் தாவும்
வன்பொருள் தவழும்
“கருமேகத்திட்டு ஒன்று கதிர்மறைத்த கணநேர நிழல் அது. வீடு வரை வெயில் இப்படித்தான் உறைக்கும். தலையே தாங்கிக்கொள்”
“சேர்ந்து நடப்பவர் காண். எடுத்த அடிவைப்பிலும் இடக்கை வீச்சிலும் வலக்கை அசைவிலும் என்னவொரு இசைவு. முகம் பார்க்காமலேயே விரைகையிலும் இவ்வுதடு முடிக்க அவ்வுதடு தொடங்கும் பேச்சிசை. சேர்ந்தும் நடைபயில்”
“எட்டு மணிக்குள் சேர என்னதான் ஓடினாலும் சொல்லிவைத்து ஒரே வண்ணச் சேலை. கூந்தலில் ஆளுக்கொரு வகை பூச்சரம். அழகுணர்ச்சி அவரிடம் பயில்”
“மழையும் வேண்டும். மாநகர வாழ்வும் வேண்டுமா? தேங்குநீரில் கசிவிறக்கும் புதைமின்வடமும், நீர்சுழித்திறங்கும் திறந்த ஆட்குழியும், புழுதிக்குழம்பைச் சிதற்றும் வாகனமும் பார்த்து நட.”
ஈரப் பச்சை வயல்களுக்கிடையே
இருக்கிறது ஒரு உவர்நிலம்
வெளுத்த மண்பொட்டல்
வாய்க்கால் இருக்கும் பக்கம்
நீர் கசிந்து உப்புப் பரிந்திருக்கும்
கண்ணாடிச் சில்லுகள்
காக்காமுட்கள்
மத்தியில் ஒரு நைந்த செந்துணி
பாதி புதைந்து வெளித்தெரியும்
வீடுகளுக்கிடையே இருக்கிறது
வில்லங்கத்திலிருக்கும் காலிமனை
செழித்த சீமைக்கருவேலப் புதர் நிழல்
பால்பச்சை எருக்கஞ்செடிகள்
மழுமட்டைச்செடிகளில்
பூத்துச்சிரிக்கும் ரேடியோப்பூக்கள்
எங்கிருந்தோ இடிபட்டுக் கொட்டப்பட்ட
கான்கிரீட் கட்டி ஒன்றிலிருந்து
காளானொன்று முண்டி முளைக்கும்
நிறுவிய மென்பொருளை
நீக்குகின்ற பணி
20%..21%….22% என
சிறுகச் சிறுக நிகழ்கிறது
கருவேலங்கொப்பில் அமர்ந்த
வாலாட்டிக்குருவி
பார்த்துக்கொண்டிருக்கும்போதே
பறந்துவிடுவதைப் போல
இளவேனில் வாரமொன்றில்
செழித்து முதிர்ந்த
வாதுமை இலைகள்
சடசடவென உதிர்ந்து
சருகாதல் போல
எப்படியெல்லாமோ
நிகழவேண்டுமென்று
நீங்கள் நினைக்கிறீர்கள்
உள்ளே என்னென்ன
நடக்கிறதோ
நமக்கெங்கே தெரியும்
சிலவேளைகளில்
என்ன நீக்கினாலும்
எல்லாத் தடயங்களையும்
துடைத்தொழிக்க முடியாது
மேசைவிசிறி கோளாறாகி
சுழலாமல் போய்விட
காற்று வரவில்லை
இருசக்கர வாகனம்
ஏறிப் பின்னமர்ந்து
எடுத்து மடியில்வைத்து
சரிசெய்ய விரைய
காற்று நன்றாக வருகிறது
விசிறி சுழல்கிறது
24/05/14
அகத்தியர் அருவியில் குளிப்பவர்கள்
அடிவாரத்தில் ஆற்றில்
குளிப்பவர்களைப் பார்த்து மகிழ்கிறார்கள்
கல்யாண தீர்த்தம் அருகே கால் நனைப்பவர்கள்
இவர்களைப் பார்த்துச் சிரிக்கிறார்கள்
பாண தீர்த்தம் வரை சென்றவர்களுக்கு
உள்ளூர ஒரு திருப்தி
விசும்போ
எல்லாவற்றுக்கும் மேலே
இருந்தும் இல்லாதிருந்தும்
எங்கிருந்தோ எடுத்து
எங்கேயோ கொடுத்துக்கொண்டிருக்கிறது
20/05/14
மதிய உணவு சாப்பிடுகையில்
மரம்மீதொளிந்தமர்ந்து பார்த்தன
தண்டரைக் குரங்குகள்
திருப்பரங்குன்றம்
மொட்டைமலைக் குரங்குகள்
கிட்ட இருக்கும் கல்லூரி மாணாக்கரின்
வட்டக்கிண்ணங்கள்
திருடித்திறந்து
தின்னத்தெரிந்தவை
அழகர்கோயில் கூட்டங்கள்
தைரியமாகத் தட்டிப்பறிப்பவை
வீசியெறியும் பண்டத்துக்காய்
வந்து நின்றாலும்
துள்ளல்நடையில் வருவதிலும்
வால்சுருட்டி அமர்தலிலும்
கம்பீரமானவை பாபநாசத்துக்
கருமுக மந்திகள்
பரிணாமத்தின்
சிறுகண்ணியொன்றின்
குறும்பரப்பின்
நுண்ணிழைகளில்
தாவிச் செல்லும் இவை
என்னிடம் சிக்கிக்கொள்கின்றன
18/05/14
இரவு
பகல்
மீண்டும்
இரவு
பகல்
மீண்டால்
இரவு
பகல்
18/05/11
முதல் நாள் நடக்கிறேன்
புதிய மனிதர்கள்
பரபரப்பு, சந்தடி, குழப்பம்
தினமும் நடக்கிறேன்
அதே மனிதர்கள்
நிதானம், அமைதி, ஒழுங்கு
இப்படித்தான்
இளைஞன் ஒருவன்
மனப்பிடி இழந்தோ, பிளந்தோ, பிணித்தோ
நடைவழி நிழற்குடையில்
அங்கேயே கிடந்து, மயங்கி
கிடைத்தது உண்டு
உறங்கி, கழித்து
ஒரு நாளில் உயிரும் விடும்வரை
தினமும் பார்த்தேன்
கொப்பரமுழுங்கி 